فطست ضحك من هذا المنشور 😂😂😂
جالس سامر الساعة 1:30 بعد نص الليل دق باب الشقة جاري وقال يا جارنا لوسمحت تعال افعل أجر معانا في واحد من المهمشين مات مسكين مامعاهم حد ...
قلت له : على طول إبشر
خرجت معه وسرنا وماوصلنا الا وقدو مكفن جاهز
قالت مرته انه كان مخزن واشترغ بالقات
في وقت الحديث معاهم مازد دريت وين امتشع جاري ابن اللذينه ..!؟
احنبني في ذيه الموقف وامتشع ، المهم شليناه المقبرة اخر الليل ومقبرة وميتين وليلة حوساء وظلام دامس يعني من قوه الرعب "حمض القات في لقفي"
وصلنا المقبرة والقبر مفتوح طرحنا الميت على جنب ونزل اكبرهم سنا للقبر علاسب يلقف الميت حملناه نزلناه للقبر.
لا دريس ولا تهليل ولا ياسين ولا حتى الفاتحة ولا شي اللي معانا كلهم عاقين والديهم طارحين السماعات في اذانهم مدري مابيسمعوا محمد عبده مدري احلام مدري فيصل علوي..
شويه الا والشيبة بيفتح عل وجه الميت،وطرح شوية تراب في انف الميت وجالس يوسده "يوضعه"
وعينك ماتشوف الى النور
عطس الميت عطسة ساع قنبلة عطان وبدأ مارثون الجري في المقبرة ..
انا يبست بقعتي حرام ما دريت اين انا ورحمت الشيبة اللي داخل القبر نزل يتجمل مع الميت ، حرام انه ماعاد استر يطلع من القبر من الفجيعة
جلس يفلخط بيداته وارجله عل جدار القبر ساع توم وجيري يشتي يطلع يهرب لكن تحياتي ...
اول مره في حياتي ابسر اسود يصفر من الفجيعه ...
وحين ابسرني الوحيد عادنا مسنب عل باب القبر بدأ يمد يده يازعم اطلعه. ...ومسكني في ارجلي وانا في حالة ذهول...! تسمرت ساع الخشبة
عاده غير مسك ارجلي وانا ناولت ابوه زبط لداخل القبر دفاع عن النفس .. هذا قبر مافيه صفاااط
ابن اللذينه يشتي يهزرني لوسط القبر ونجلس ثلاثة داخل الحفرة. ..
قسماً بلله ان غريزة الحياه فيني ارتفعت لمليون % وابن الذينه ماسك بارجلي وبالثوب حقي وما فكهن الا بعد زبط وخفع ودبج لا ارادية مع اصوات غريبة وكلمات اغريقة ماناش داري ماهو ..!
شوية وارتكز الميت ...سنب. ..وقف على ارجله .. ومع رد الفعل اللاارادي رجعت لورا وبيدي لمست شي ماناش داري ماهو ..المهم من قوة الفجيعة ماركزت فيه ايش هوه .... هزرته ورجمته به
طلع انه كلب كان راقد في المقبرة...رجمت به لفوقهم لداخل القبر وانهم "إثنين وثالثهم كلبهم"...
المهم حشرت الثوب للركبه وطيران ساع البرق وتعركلت بحجر مطروحه باب المقبرة واختبطت على وجهي من فوق السرير لوسط الغرفة وقمت من نومي العن اليوم اللي خزنت فيه قات مطري ....!
